Erməni cinayətkar şəbəkəsinin üzvləri həbs edildi

Avropa Polis Təşkilatı Ermənistan və Gürcüstandan olan cinayətkar qruplaşmanın 28 üzvünün həbs edildiyini açıqlayıb.

Əmlak cinayətləri, reketçilik, hədə-qorxu ilə pul tələb etmək və çirkli pulların yuyulmasında iştirak edən “qanuni oğru” adlanan böyük cinayət şəbəkəsinin sıradan çıxarılmasında Fransa və İspaniya Milli Polisinə Europol dəstək verib.

Araşdırma zamanı müəyyənləşib ki, cinayətkar şəbəkə oğurlanmış malların satışı, tütün qaçaqmalçılığı və çirkli pulların yuyulması ilə məşğul olub. 2020-ci ilin noyabr ayından Fransa polisi qanuni oğrular şəbəkəsinə aid olmaqda şübhəli bilinən şəxsləri araşdırır. İstintaq Fransa və İspaniyada fəaliyyət göstərən qanuni oğrunun rəhbərlik etdiyi erməni cinayət təşkilatını ifşa edib.

Çirkli pulların yuyulması əsasən İspaniyada avtomobil mexanikləri və Barselonada idxal edilən kürü mağazası vasitəsilə həyata keçirilib. Əməliyyat tədbirləri çərçivəsində Fransa və İspaniyada 38 evdə axtarış aparılıb, 28 nəfər, o cümlədən adı qeyd olunmayan oğruların başçısı həbs edilib. Əməliyyatlar zamanı 16 bahalı saat, 8 avtomobil, 6 döyüş sursatı, 1 zirehli jilet, 60 min avrodan çox pul, habelə qanuni oğruların müxtəlif əşyaları ələ keçirilib.

Fransa və İspaniya hakimiyyəti 2020-ci ilin noyabrından bu cinayət şəbəkəsi ilə bağlı birgə araşdırmaya başlayıb. Məlum olub ki, qruplaşmanın əksər üzvləri eməni və gürcülərdən ibarətdir.