Ermənistanın hərbi büdcəsi 4 dəfədən artıq artırılıb | Rəsmi açıqlama

“2017-ci ildə Ermənistanın hərbi büdcəsi təqribən 400 milyon dram olub, son illərdə hökumətimiz hərbi büdcəni 1 milyard 700 milyon drama qədər artırıb”.

Bunu Ermənistanın hakim “Vətəndaş Müqaviləsi” Partiyasının deputatı Vaaqn Aleksanyan deyib.

“Bu xərclər əsasən hərbi satınalmalara aiddir. Onlar plan üzrə aparılır. 2026-cı ildə alınma ehtiyacı azalacaq. Çünki 2025-ci ildə artıq lazımi alışlar edilib”, - deputat bildirib.

Aleksanyan qeyd edib ki, buna baxmayaraq əlavə planlaşdırma aparılır: “Hesab edirəm ki, kəskin artıma artıq ehtiyac yoxdur, çünki birincisi, Ermənistan və Azərbaycan sülh sazişini paraflayıblar, ikincisi, son illərdə büdcənin onsuz da kəskin artım tempi kifayətdir”.

Jurnalistlərin qüvvələr balansının bərpa olunub-olunmaması ilə bağlı sualına Aleksanyan belə cavab verib: “Niyə özümüzü birbaşa Azərbaycanla müqayisə etməliyik? Ermənistanın suveren ərazisini müdafiə edə biləcək döyüşə hazır ordumuz olmalıdır. Məhz buna görə də hökumətimiz əvvəlki cüzi 400 milyonluq büdcəni 1 milyard 700 milyona çatdırıb”.

Jurnalistlər Aleksanyandan Ermənistanın 2020-ci ildə silahının az olub-olmamasına görə uduzduğunu soruşanda o qeyd edib: “Sizdən metal qırıntılarını silah kimi təqdim etməməyinizi xahiş edirəm. 1950-ci illərin silahları vardı. Əziz insanlar, mətbəx bıçağı ilə də döyüşmək olar, amma bu, rəqibinizin nə ilə vuruşmasından asılıdır”.