Əsas hədəf kim idi? - Dağıstandakı silahlı hücum bu tarixdən planlanıbmış

Dağıstanda törədilən terror aktı ilə bağlı yeni faktlar aşkarlanıb.

Hadisəni törədənlərin telefonlarından əldə olunan yazışmalara əsasən hücumun təxminən bir ay ərzində planlaşdırıldığı bildirilir.

Bu barədə Rusiya KİV məlumat yayıb. Xəbərə görə, Dərbənddəki Müqəddəs Məryəm Kilsəsinin rəhbəri Nikolay Kotelnikov hücumun əsas hədəflərindən biri olub. Onun şəkli telefon yazışmalarında da öz əksini tapıb.

“Terror aktının hazırlanması zamanı Dərbənddə yerləşən sinaqoq və Mahaçqaladakı pravoslav kilsəsi də terrorçuların hədəfində olub”, – deyə xəbərdə qeyd olunub.

Bundan başqa, din xadimi Nikolay Kotelnikovun yaxınları onun dəfələrlə hədə-qorxuya məruz qaldığını da bildiriblər.

Məlumat üçün bildirək ki, kilsənin rəhbəri hücumçuların yolunu kəsməyə cəhd edərkən həlak olub. O, alnından güllələnərək öldürülüb.