Əsədlə bağlı şok | Rusiyanın Suriyada yeri yerindən oynadacaq planı görün nə imiş - Baku TV

Rusiya Prezidenti Vladimir Putinin ətrafı Suriyada hakimiyyət dəyişikliyi planı hazırlayıb və ölkə prezidenti Bəşər Əsədin yerinə onun həyat yoldaşı Əsma Əsədin gətirilməsi variantını nəzərdən keçirib.

Bu barədə Böyük Britaniyanın "The Observer" qəzeti məlumat yayıb.

Nəşrin yazdığına görə, Kreml 2024-cü ilin dekabrında Bəşər Əsəd hakimiyyətini itirməzdən bir neçə ay əvvəl onun mümkün varislərinin siyahısını hazırlayıb. Siyahıda ilk yerdə Əsma Əsəd olub.

Qəzetin keçmiş Suriya hakimiyyətinə yaxın mənbəsinin sözlərinə görə, 24 il ölkənin birinci xanımı olan Əsma Əsəd Prezident sarayında əsas təsir fiqurlarından biri sayılıb.

"Əgər Əsma razı deyildisə, Prezident vasitəsilə heç bir qərarı keçirmək mümkün olmurdu. Bəşər Əsəd, demək olar ki, bütün məsələlərdə onunla məsləhətləşirdi", – deyə mənbə bildirib.

Məlumata görə, 50 yaşlı Əsma Əsəd "İqtisadi Şura"ya rəhbərlik edib və ölkə iqtisadiyyatının böyük hissəsinə nəzarəti həyata keçirib.

İş adamlarının öz aktivlərini məhz Əsəd ailəsinin etibarlı şəxslərinə verməyə məcbur olunduğu da qeyd edilir. Buna qarşı çıxanlar isə vergidən yayınma ittihamı ilə təqib olunub, bank hesabları dondurulub və ya müəssisələri bağlanıb.

"The Observer" yazır ki, Vladimir Putin Bəşər Əsəddən narazı olub. Kreml hesab edib ki, Rusiyanın hərbi dəstəyinə baxmayaraq, Əsəd nə vətəndaş müharibəsini dayandıra, nə də ölkədə siyasi sabitliyi təmin edə bilib.

Mənbənin sözlərinə görə, ona hakimiyyəti həyat yoldaşına vermək təklifi də edilib, lakin Əsəd bu ideyanı lağa qoyub. Suriya rejiminin süqutundan sonra Bəşər və Əsma Əsəd Rusiyaya qaçıblar.

Məlumata görə, keçmiş prezident faktiki olaraq Rusiyanı tərk edə bilməsə də, Əsma Əsəd xarici ölkələrə səfərlərini davam etdirir.

Bildirilir ki, o, mütəmadi olaraq Dubaya gedir. Bununla yanaşı, onun doğulduğu Böyük Britaniyaya və Avropa İttifaqı ölkələrinə girişinə qadağa tətbiq olunub.