Fələstini aparıcı ölkələrin ardından bu dövlət də rəsmən tanıyıb

“Portuqaliya da Fələstini dövlət olaraq tanıyıb”.

Bunu Portuqaliyanın xarici işlər naziri Paulo Rangel açıqlayıb.

Rangel ölkəsinin Fələstin dövlətini rəsmi olaraq tanıdığını və qalıcı sülh üçün yeganə həll yolu olan ikidövlətli həlli dəstəklədiklərini bildirib.

Qeyd edək ki, sentyabrın 21-də daha 3 ölkə Fələstini rəsmən tanıyıb ki, bunlar da Böyük Britaniya, Avstraliya və Kanadadır. Birləşmiş Millətlər Təşkilatının Baş Assambleyasında Fransa və Belçikanın da Fələstin dövlətini tanıması gözlənilir.

Fələstin lideri Mahmud Abbas Fələstin dövlətinin tanınmasını ədalətli və dayanıqlı sülhə aparan mühüm addım adlandırıb. Mahmud Abbasın sözlərinə görə, hazırda əsas prioritetlər Qəzza zolağında atəşkəsin təmin olunması, humanitar yardımın çatdırılması, bütün girov və məhbusların azad olunması, İsrail qoşunlarının tamamilə geri çəkilməsi və bərpa prosesinə başlanmasıdır.

Fələstin Xarici İşlər Nazirliyi isə öz növbəsində, başda ABŞ olmaqla, hələ Fələstin dövlətini tanımayan ölkələrə tanıma prosesinə başlamaq çağırışı edib.