Fransa imperatoru Napoleonun şəxsi qılıncı hərraca çıxarıldı

18-ci əsrin sonu – 19-cu əsrin əvvəllərində Fransanın imperatoru olmuş Napoleon Bonapartın şəxsi qılıncı hərraca çıxarılıb.

Napoleon onu Fransa Respublikasının Birinci Konsulu olarkən Versal manufakturasının rəhbəri Nikolas-Noel Boutetdən sifariş edib. Qılınc hakimiyyətinin sonuna qədər Napoleonda qalıb və Elba adasına sürgün edilməzdən əvvəl taxtdan imtina edən imperator onu marşal Emmanuel de Qruçiyə təhvil verib.

"1815-ci ildən bəri silahlar marşalın nəsilləri tərəfindən saxlanılır və ilk dəfə olaraq açıq hərraca çıxarılacaq", – deyə “Drouot” hərrac evi bildirib.

Həmçinin qeyd olunub ki, bu, Napoleonun Versal manufakturasından sifariş etdiyi iki eyni qılıncdan biridir. İkincisi rus generalı qraf Pavel Şuvalova hədiyyə edilib və Sankt-Peterburqdakı Ermitaj muzeyində saxlanılır.

Mütəxəssislər hərraca çıxarılan qılıncın dəyərini 700 min avro ilə 1 milyon avro arasında qiymətləndirirlər.