Fransa yeni Baş naziri yox, Prezidenti devirmək istəyir

Fransada müəllim, nəqliyyat işçiləri, əczaçılar və ictimai sektorda çalışanların etiraz aksiyası hökuməti maaş, təqaüdlər, eləcə də ictimai xidmətlərlə bağlı qəbul edilmiş qərarları yenidən nəzərdən keçirməyə məcbur etmək məqsədi daşıyır.

Fransada baş verən son etirazlar sosial-iqtisadi və siyasi problemlərin kulminasiya nöqtəsidir.

Prezident Emmanuel Makronun dövründə vəzifədə çalışmış baş nazirlərin həyata keçirdiyi sosial-iqtisadi islahatlar xalqı hiddətləndirib. İnsanlar verilən əməkhaqqının onların həyat səviyyəsinə uyğun olmadığı barədə dəfələrlə həmkarlar ittifaqları vasitəsilə hökumətə çağırışlar ediblər. Lakin fransız hökuməti insanların maaş ehtiyacını qarşılamaqda çarəsiz vəziyyətə düşüb.

Ölkədə "sakit inflyasiya" hökm sürür. Belə ki, ərzaq qiymətlərində də bahalaşma müşahidə edilir.

E.Makron hökumətinin təqaüd islahatları da insanların səbir kasasını doldurub. Pensiya yaşı artırılıb və bu, əhalinin geniş təbəqəsi tərəfindən ədalətsiz addım kimi qiymətləndirilir.

Yeni Baş nazir Sebastian Lekornunun bunu yenidən nəzərdən keçirəcəyi gözlənilsə də, islahat gözlənti olaraq qalıb. Əslində, bu kimi məsələlərlə daha çox hökumət məşğul olsa da, əsas günahkar ölkə Prezidentidir. E.Makron Baş nazir təyin edilən hər kəsə təzyiq göstərərək öz ağlındakı iqtisadi siyasəti tətbiq edir.

Bu baxımdan etirazlar Fransadakı ədalətsiz idarəçilik sisteminə qarşı yönəlib. E.Makron real addımlar atmasa, bu dəfə məsələ Baş naziri dəyişdirməklə bitməyə, elə onun özünün devrilməsinə gətirə bilər.