Güclü yağışlar torpaq sürüşməsinə səbəb olub | Kolumbiya

04 fevral 2026 143 baxış

Kolumbiyanın Santa Marta şəhərində güclü yağışlardan sonra baş verən torpaq sürüşməsi nəticəsində üç nəfər həyatını itirib.

Bu barədə ölkənin Milli Fəlakət Risklərinin İdarə Olunması Bölməsi məlumat yayıb.

Qeyd olunur ki, fevralın 2-si səhər tezdən Magdalena departamentində qeydə alınan torpaq sürüşməsi 8 evi tamamilə dağıdıb, azı 50 yaşayış evinə ciddi ziyan vurub.

Hadisə zamanı sakinlər güclü səs-küy eşitdiklərini və palçıq selinin qəfil yamacdan aşağı endiyini bildiriblər. Ölkənin Kordoba departamentində isə San Xorxe çayının daşması nəticəsində minlərlə sakin su altında qalan küçələri kiçik qayıqlarla tərk etmək məcburiyyətində qalıb.

Yerli hakimiyyət orqanları bir sıra ərazilərdə qəfil daşqın təhlükəsi barədə xəbərdarlıq edib.

Milli Fəlakət Risklərinin İdarə Olunması Bölməsinin açıqlamasına görə, Kolumbiya üzrə təxminən 10 min ailə zərər çəkib. Qeyd olunub ki, ölkədə bu il yağıntılar normadan 64,6 faiz çoxdur.

#Kolumbiya