Günəş fırtınaları Kosmosda hansı problemləri yaradır? | Alimlərdən həyəcan təbili

Güclü Günəş fırtınaları Yupiterin maqnitosferini sıxır. Bu isə atmosferin kəskin istiləşməsinə səbəb olur.

Reading Universitetinin alimləri bildiriblər ki, ilk dəfə 2017-ci ildə baş verən hadisə planetin yarısını əhatə edən nəhəng istilik zonası yaradıb və burada temperatur 500°C-yə çatıb. Yupiter üçün bu, normadan 350°C çoxdur. Belə günvurmalar Yupiterdə ayda 2-3 dəfə olur.

Əvvəllər güman edilirdi ki, Yupiterin atmosferi sürətlə fırlandığı üçün günəşin təsirindən qorunur. Lakin yeni məlumatlar bu fərziyyəni təkzib edir: maqnitosferin sıxılması qütb rayonlarının qızmasını artırıb, bu da atmosferin yuxarı təbəqələrinin genişlənməsinə və ekvatora doğru isti qazın yayılmasına səbəb olub.

“Biz əvvəllər Yupiterin günəş küləyinə reaksiya verdiyini heç vaxt görməmişdik. Bu, tamamilə sürpriz oldu”, ‒ deyən tədqiqatın aparıcı müəllifi Ceyms Odonoqye əlavə edib ki, planetin maqnit sahəsi top kimi büzülərək nəhəng istilik zonası yaradıb.

Tədqiqatın həmmüəllifi professor Metyu Ouensin sözlərinə görə, işin nəticələri günəş fırtınalarını və onların Yerdə GPS, rabitə, elektrik şəbəkələrini poza biləcək təsirini daha dəqiq proqnozlaşdırmağa kömək edəcək.