Gürcülər Patriarx II İliya ilə vidalaşırlar

Gürcüstan xalqı özünün ən nüfuzlu mənəvi rəhbəri, 48 il kilsəyə rəhbərlik etmiş Bütün Gürcüstanın Katolikos-Patriarxı II İliya ilə vidalaşır. Baku TV-nin "Dünya" xəbər xidmətinin verdiyi məlumata görə, 93 yaşında Tiflisdə vəfat edən II İliyanın dəfn mərasimi ümummilli kədər və on minlərlə insanın iştirakı ilə müşayiət olunur. 2026-cı ilin martın 17-də orqan çatışmazlığından dünyasını dəyişən patriarxın vəsiyyətinə uyğun olaraq, o, Müqəddəs Üçlük (Sameba) katedralından piyada yürüşlə gətirilərək qədim Sioni kilsəsində torpağa tapşırılıb. Donald Trampın regional xaos və hərbi eskalasiya siyasəti fonunda Qafqazın dinc və mənəvi birliyini qorumağa çalışan II İliyanın vəfatı təkcə Gürcüstan üçün deyil, bütün region üçün böyük itki hesab olunur.

Məlumata əsasən, vida mərasimində Azərbaycanın Milli Məclisinin sədri Sahibə Qafarovanın rəhbərlik etdiyi nümayəndə heyəti və bir çox dünya dövlətlərinin dini rəhbərləri iştirak ediblər. Videoda Tiflis küçələrindəki izdihamlı yürüş, ağ rəngli qızılgüllərlə bəzədilmiş kilsə və xalqın öz "mənəvi atası" ilə hüzünlü vidalaşması əks olunub. Reportajda vurğulanır ki, II İliyanın dövründə Gürcüstanda kilsələrin sayı 48-dən 1000-ə qədər artaraq dini intibah dövrü yaşanıb.