Gürcüstan ABŞ-ni qınamırsa, bəs kimi qınayır? | Kimlərə viza məhdudiyyəti qoyuldu?

Gürcüstanın Baş naziri İrakli Kobaxidze bildirib ki, Gürcüstana qarşı sanksiyaların tətbiqində günahkar ABŞ rəsmiləri deyil, oliqarxlardır.

ABŞ hakimiyyəti Gürcüstanın daxili və xarici siyasətini tənzimləmək üçün ona qarşı sanksiyalar tətbiq edib. Lakin nəticə tam əksi olub. Həmin gün Tiflisdə eynicinsli münasibətlərə qarşı yönəlmiş qanun layihələri paketi qəbul edilib. Respublikanın Qərb tərəfdaşları yalnız parlament seçkilərinin nəticələrini gözləyə bilərlər.

ABŞ Dövlət Departamenti “Xarici agentlər haqqında” qanunun qəbulunda iştirak edən “Gürcü arzusu” partiyasının və hüquq-mühafizə orqanlarının 60-dan çox nümayəndəsinə, habelə onların ailə üzvlərinə qarşı viza məhdudiyyəti tətbiq edib.

Bundan əlavə, Gürcüstan Daxili İşlər Nazirliyinin xüsusi təyinat departamentinin rəhbəri Zviad Xarazişvili və onun müavini Miler Laqazauri, həmçinin “Alt-İnfo” ilə əlaqəli olan Konstantin Morqoşiya və Zurab Maxaradze Amerikanın maliyyə məhdudiyyətləri altına düşüb.

Onlardan ilk ikisi Vaşinqton tərəfindən Gürcüstan hökumətinin əleyhdarlarına qarşı zorakılıqda, qalanları isə insan haqlarının ciddi şəkildə pozulmasında və müxalifətçilərə hücumda ittiham olunur.

ABŞ Dövlət Departamentinin sözçüsü Metyu Miller deyib ki, bu qərar “Gürcü arzusu” hökumətinin davam edən antidemokratik hərəkətləri nəticəsində yaranan ABŞ-Gürcüstan əməkdaşlığının hərtərəfli təhlilinin bir hissəsi kimi qəbul edilib.

“Gürcüstan hökuməti azad və ədalətli seçkilər keçirməklə, antidemokratik qanunvericiliyi ləğv etməklə və Avropa İttifaqına üzvlük üçün zəruri olan islahatlarda mühüm irəliləyiş əldə etməklə Avro-Atlantik yola qayıda bilər”, – diplomat yekunlaşdırıb.

Gürcüstanın Baş naziri İrakli Kobaxidze isə deyib ki, vəziyyətin belə alınmasında günahkar Dövlət Departamenti deyil, ABŞ-nin rəsmi qurumlarına əsas təsir göstərən oliqarx qüvvələrdir.

“Buna görə də biz ABŞ-yi deyil, təəssüf ki, konkret qurumlardakı ədalətin qurbanı olan oliqarx təsirləri günahlandırırıq”, – Gürcüstan hökumətinin başçısı izah edib.