Hər şeyi bir günə itirəcəyik! | Vardanyan Paşinyana od püskürdü

“Paşinyan tərəfindən həyata keçirilən anti-Rusiya təbliğatı və xarici siyasət Ermənistanın regionda “ağılsız siçovul” statusu almasına gətirib çıxarıb”.

Bu barədə Ümumerməni Fondunun keçmiş direktoru Ara Vardanyan bildirib.

“Bu gün aktiv anti-Rusiya təbliğatı aparanların hamısı nədənsə seçdiyi kurs nəticəsində Ermənistanı hansı nəticələrin təhdid etdiyi barədə susur, sözün hərfi mənasında ölkədə aclıq olacağını demirlər. Bu gün hamı öyrəşib ki, işıq var, qaz var, mağazalarda yemək var, amma az adam başa düşür ki, Rusiya və İranla münasibətlər pozulacağı təqdirdə Ermənistan bütün bunlardan bir gecədə məhrum ola bilər”, – deyə o qeyd edib.

A.Vardanyan Gürcüstanın Rusiya ilə münasibətlərini fəal şəkildə bərpa etməsinə, Azərbaycanın isə həm Rusiya, həm də NATO ölkəsi Türkiyə ilə əlaqələrini intensivləşdirməsinə diqqət çəkib. Onun sözlərinə görə, bunun fonunda Ermənistan Qərbin boş vədlərinə əsaslanaraq Rusiya ilə münasibətlərini aktiv şəkildə korlayır.

“Biz regionda bir növ mənasız siçovul statusu qazanırıq, bu səbəbdən hamı pis qoxuya görə burnunu yuxarı qaldırır”, – deyə A.Vardanyan əlavə edib.