İmam qəza vaxtı kimdən kömək istədi? - Hadisənin detalları ortaya çıxdı

İran Prezidenti İbrahim Rəisinin həlak olduğu helikopterdə olan şəxslərdən biri sağ qalıbmış. Həmin şəxs Seyid Məhəmmədəli Əl-Haşim olub. O, hadisədən sonra bir saat ərzində həyatda qala bilib.

Bu barədə İranın Kritik Vəziyyətlərin İdarə Edilməsi üzrə Dövlət Təşkilatının rəhbəri Məhəmməd Həsən Nami bildirib.

“Təbriz imamı Əl-Haşimin meyiti digərlərinə nisbətən daha yaxşı vəziyyətdə olub və daha az xəsarət alıb. O, qəzadan sonra bir saat yaşayıb”, – deyə təşkilat rəhbəri bildirib.

Onun sözlərinə görə, Seyid Məhəmmədəli Əl-Haşim hətta Prezident Administrasiyasının rəhbəri Qulamhüseyn İsmaili ilə telefonla əlaqə yaratmağa da nail olub. Amma helikopterdə olan ölkə prezidenti, xarici işlər naziri və digər şəxslər hadisə yerində həlak olublar.