İran 8 yeni AES inşa etdirməyi planlaşdırır

“ABŞ İsraili dəstəkləməyi dayandırsa, regiondakı hərbi bazaları bağlasa və regional məsələlərə müdaxilə etməsə, Ağ Evin əməkdaşlıq təklifini nəzərdən keçirə bilərik”.

Bu sözləri İranın Ali Rəhbəri Seyid Əli Xamenei məktəbli və tələbələrlə görüşdə bəyan edib.

Tehranda keçirilən bu tədbir dünyəvi təkəbbürlə mübarizəyə həsr olunub.

Qeyd edək ki, Vaşinqtonun da Tehranla əməkdaşlıqda öz şərtləri var və bunlardan ən əsası uranın zənginləşdirilməsinə məhdudiyyətin qoyulmasıdır.

İranın Prezidenti Məsud Pezeşkian isə son çıxışlarının birində islam respublikasının nüvə obyektlərinin bərpa ediləcəyini söz verib.

İran Rusiya ilə əməkdaşlıq çərçivəsində 8 yeni atom elektrik stansiyası da inşa etmək niyyətindədir.

Bunu İranın Atom Enerjisi Təşkilatının rəhbəri Məhəmməd İslami bildirib.

Hətta bununla bağlı Tehranla Moskva arasında saziş imzalanıb.

Qeyd olunan AES-lərdən 4-ü İranın cənubunda Buşehr vilayətində, 4-ü isə ölkənin şimal hissəsində inşa olunacaq.

Onun sözlərinə görə, Buşehr AES-in 2 və 3-cü bloklarının tikintisi hətta İsraillə son müharibə dövründə davam etdirilib. Hazırda da tikinti prosesi davam edir. Məqsəd ölkənin stabil və təmiz nüvə enerjisi ilə təminatıdır. İran bu yolla elektrik enerjisinə artan tələbatı ödəməyi planlaşdırır.