İran İsfahandakı uranı çıxarmağa hazırlaşır? - Baku TV

İran İsfahandakı nüvə obyektinin dağıntıları altında qalan əsas yüksək zənginləşdirilmiş uran ehtiyatını dar tunel vasitəsilə əldə edə bilər.

Bu barədə "The New York Times" məxfi hesabatlarla tanış olan bir neçə rəsmi şəxsə istinadən məlumat yayıb.

Qəzet qeyd edib ki, fevral ayında çəkilən peyk görüntülərində qərb girişi də daxil olmaqla tunellərin bir neçə girişində genişmiqyaslı qazıntı işləri aparıldığı görünür.

Müəllif bildirib ki, sözügedən uran ehtiyatları 12 günlük müharibə zamanı ABŞ-nin zərbələrindən sonra dağıntılar altında qalıb.

Amerika rəsmilərinin sözlərinə görə, ABŞ kəşfiyyatı İsfahandakı obyekti fasiləsiz müşahidə edir. Onların fikrincə, ABŞ İranın və ya digər qrupların uran ehtiyatlarının yerini dəyişmək üzrə istənilən cəhdini aşkar etmək və buna reaksiya vermək iqtidarındadır.

Nəşrin yazdığına görə, İsfahanda dağıntılar altında qalan uran ehtiyatı İranın nüvə silahı yaratması üçün əsas element ola bilər. Bununla yanaşı, qəzet vurğulayıb ki, İranın qaz halında olan və konteynerlərdə saxlanılan uranın yerini nə qədər tez dəyişə biləcəyi hələlik aydın deyil.

Amerika rəsmilərinin məlumatına görə, İran təxminən 440 kiloqram yüksək zənginləşdirilmiş urana malikdir və bu ehtiyat əsasən İsfahanda yerləşir. Uranın cari zənginləşdirilmə səviyyəsi 60 % təşkil edir, nüvə silahı yaratmaq üçün onu 90 %-ə çatdırmaq lazımdır.