İran rejiminin gənclərə qarşı cinayətinin səbəbi

İranın kəşfiyyat və təhlükəsizlik xidmətlərinin əməkdaşları ölkədə keçirilən etirazlar zamanı saxlanılan uşaqlara qarşı döyülmə, elektroşok və cinsi zorakılıq da daxil olmaqla dəhşətli işgəncələr törədir. Məqsəd onların nümayişlərdə iştirakının qarşısını almaqdır.

Bu barədə “Amnesty İnternational” təşkilatının martın 16-da dərc etdiyi məqalədə bildirilib. 22 yaşlı Məhsa Əmininin öldürülməsinin səbəb olduğu xalq üsyanının altı ayının tamam olduğunu qeyd edən təşkilat molla rejiminin uşaqlara qarşı törətdiyi cinayət əməllərinin üstünü açıb.

“Amnesty International”ın Yaxın Şərq və Şimali Afrika üzrə regional direktorunun müavini Dayana Eltahavi təhlükəsizlik və kəşfiyyat orqanlarının həbsdə olan oğlan və qızları cəzalandırmaq, alçaltmaq və onlardan “etiraf” almaq məqsədilə istifadə etdikləri işgəncələrdən danışıb.

Bildirib ki, İran hökuməti uşaqları zorla ailələrindən alır və onları yolverilməz qəddarlığa məruz qoyur. Bu zorakılıq ölkə gənclərinin ruhunu boğmaq, onların öz haqlarını tələb etmələrinin qarşısını almaq üçün düşünülmüş strategiyanın göstəricisidir. Aksiyalara görə saxlanılan bütün uşaqlar dərhal azad edilməlidir”, - deyə Dayana Eltahavi bildirib.