İran və ABŞ arasında gərginlik yenidən artır? | Regionda münasibətlər kəskinləşir - Baku TV

"İran Silahlı Qüvvələri ABŞ-nin dəniz blokadası ilə bağlı istənilən hərəkətinə hərbi cavab verəcək".

Bu barədə İran parlamentinin deputatı Əli Xəzərian bildirib.

"Bundan sonra ABŞ-nin dəniz blokadası hərəkətlərinə İran tərəfindən hərbi cavab veriləcək", – deyə o bildirib.

Ə.Xəzərian həmçinin Vaşinqtonun esminesləri və xilasetmə heyətlərini batacaqları təqdirdə qorumaq üçün əlavə müşayiət gəmiləri göndərməsini tövsiyə edib.

İranın Xarici İşlər Nazirliyinin rəsmi sözçüsü İsmayıl Bəqai isə Tehranın münaqişənin nizamlanmasına dair ABŞ-nin irəli sürdüyü razılaşma təklifinə hələlik münasibət bildirmədiyini qeyd edib.

O bildirib ki, hazırda danışıqlar prosesi çərçivəsində cavab variantı öyrənilir: "Yekun nəticə əldə olunan kimi biz bu barədə mütləq şəkildə ictimaiyyətə məlumat verəcəyik".

Qeyd edək ki, bir müddət öncə ABŞ dövlət katibi və milli təhlükəsizlik müşaviri Marko Rubio Vaşinqtonun nizamlanma təklifləri ilə bağlı Tehrandan rəsmi cavab gözlədiyini vurğulayıb.