İranda aksiyaların 100-cü günü

İranda Məhsa Əmininin ölümü ilə başlayan etiraz aksiyaları artıq 100 gündür ki, davam edir. Bu müddət çoxsaylı ölümlər, həbslər, edamlarla tarixə düşür. Son məlumatlara görə, etirazlar zamanı 69-u uşaq olmaqla azı 500 nəfər həlak olub. Minlərlə etirazçı azı 10 il müddətinə azadlıqdan məhrum edilib. Həbsdə olanlara müxtəlif işgəncələrin verildiyi də heç kimə sirr deyil.

Molla rejiminin 3 ay ərzində edam etdiyi insan sayı onlarladır. Daha 26 nümayişçi isə edamını gözləyir. Etiraz aksiyaları səbəbi ilə həbs edilənlər sırasında rejimin ali dini lideri Xamneyinin bacısı qızı Fəridə Muradxani də var. O, ev dustaqlığına buraxılmaq tələbi ilə aclıq aksiyasına başlayıb. Əgər molla rejiminə qalib gələrsə, 15 illik məhkumluq həyatından xilas ola bilər.

100 gündür davam edən aksiyalar ümumilikdə İranın 161 şəhərinə və 144 universitetinə yayılıb. Baş verənlər dünya ictimaiyyətinin də gündəmindədir. Belə ki, BMT-nin İnsan Hüquqları Şurasının 35-ci xüsusi sessiyasında yeni faktaraşdırıcı missiya yaratmaq haqqında qərar qəbul edilib. Ancaq bu günədək rejim etirazları yatırmaq üçün xalqla ortaq məxrəcə gələ bilməyib. Molla diktaturası üç aydır ki, yalnız özünəyaraşan tərzdə zorakılıqla aksiayları yatırmağa çalışır.