”İranda yeni rəhbərlik axtarmağın vaxtıdır” | ABŞ-dən sərt mesaj - Baku TV

İranda yeni rəhbərlik axtarmağın vaxtıdır və Ayətullah Əli Xameneinin 37 illik hakimiyyətinə son qoyulmalıdır.

Bunu “Politico”ya açıqlamasında ABŞ lideri Donald Tramp deyib.

Son üç həftədə ölkə üzrə minlərlə etirazçının öldürüldüyünü deyən D.Tramp buna görə də ölkə rəhbərliyini hərbi müdaxilə ilə hədələdiyini xatırladıb.

O, əvvəlcə iranlıları etirazları davam etdirməyə çağırsa da, daha sonra qətllərin dayandırıldığı barədə məlumat aldığını bildirib.

Donald Tramp İranın ali lideri Əli Xameneinin 800-dən çox insanın edam edilməməsi ilə bağlı verdiyi qərarı “ən yaxşı qərar” adlandırıb.

Donald Tramp onu da bildirib ki, rəsmi Tehran ölkəni zorakılıq və repressiya ilə idarə edir, ölkəni məhv edir və minlərlə insanın öldürülməsinə səbəb olur. 

O vurğulayıb ki, liderlik qorxu və ölümlə yox, hörmətlə olmalıdır.

“Bu adam xəstədir. O, ölkəsini düzgün idarə etməlidir və insanları öldürməyi dayandırmalıdır. Onun ölkəsi insanların yaşaması üçün dünyanın ən pis yeridir. Çünki liderlik zəifdir”, – deyə D.Tramp əlavə edib.

İranın ali dini lideri Əli Xamenei isə öz növbəsində “bilirəm ki, xalqın dolanışığı, həqiqətən, çətindir. Bilirəm ki, İranda iqtisadi vəziyyət qənaətbəxş deyil”, – deyə “X” hesabındakı paylaşımında qeyd edib.

“Dövlət məmurları və vəzifəli şəxslər səyləri iki dəfə artırmalı və işə daha ciddi yanaşmalıdırlar”, – deyən Əli Xameneinin fikrincə, əsas məhsulların ölkəyə çatdırılması üçün daha çox işləmək lazımdır.