İrandan Pakistana hücumla bağlı açıqlama

İranın xarici işlər naziri Hüseyn Əmir Abdullahian Davosda keçirilən Dünya İqtisadi Forumunda iştirak edib.

Nazir çıxışı zamanı ölkəsinin Pakistana qarşı həyata keçirdiyi hücumlara aydınlıq gətirib:

“Biz İraqın Kürd bölgəsindəki Mossad obyektini dəqiq raketlərlə hədəfə almışıq. Lakin bu o demək deyil ki, biz İraqı hədəfə almışıq. Pakistana gəlincə isə qonşumuz, qardaşımız və dostumuz Pakistanın vətəndaşları İran PUA-larının və raketlərinin hədəfi olmayıb.

İranın terror qruplaşması olan Ceyş əl-Ədl adlı qrup Pakistanın Bəlucistan əyalətinin bəzi bölgələrində məskunlaşıb. Sözügedən terror qruplaşması son günlər İran daxilində əməliyyatlar keçirib, o cümlədən polis bölməsinə hücum edərək polislərimizi qətlə yetirib.

Biz məsələ ilə bağlı Pakistanın yüksəkrütbəli hərbi, təhlükəsizlik və siyasi arenalardakı rəsmiləri ilə müzakirələr apardıq. Bizim cavabımız Pakistanın daxilində gizlənən iranlı terrorçulara qarşıdır".

Xarici işlər naziri sonda bu addımların Pakistanın və bütün regionun təhlükəsizliyinin maraqlarına cavab verdiyini də vurğulayıb.