İrəvanda Rusiya bayrağına qarşı təhqiramiz hərəkət

İrəvanda Qələbə parkında sərhədçilərə ucaldılmış abidə yaxınlığında quraşdırılmış Rusiya bayrağı və gerbi naməlum şəxslər tərəfindən qoparılıb.

Bu hadisə Ermənistanda Rusiya rəmzlərinə qarşı növbəti vandalizm aktı kimi qiymətləndirilir.

İrəvan meriyası erməni mediasına açıqlamasında baş verənlərə görə məsuliyyət daşımadıqlarını və ərazinin sahiblərinin onlar olmadıqlarını bildirib.

"İravunk" qəzeti isə xəbər verir ki, belə vandalizm aktları mütəmadi xarakter alıb və həmin ərazi məhz meriyanın idarəçiliyi altındadır.

Rusiya Xarici İşlər Nazirliyindən hələlik bu hadisə ilə bağlı rəsmi açıqlama verilməyib. Lakin ekspertlər hesab edirlər ki, bu cür təxribatlar İrəvanla Moskva arasında diplomatik gərginliyi artıra bilər.

Qeyd edək ki, Ermənistanın Rusiya ilə münasibətləri son vaxtlar gərginləşib. Bəzi erməni siyasətçilər və ictimai xadimlər açıq şəkildə Rusiyanın ölkədəki hərbi bazasının bağlanmasını tələb edirlər. Eyni zamanda Ermənistanda rus dilinin statusu və təhsildə istifadəsi ilə bağlı da mübahisələr gedir.