İsa Məsihin çarmıxa çəkilməsi ilə Ay tutulmasının əlaqəsi | Maraqlı araşdırma

NASA tərəfindən hazırlanmış modelə və Müqəddəs Kitabın Matta İncilinin 27:45 ayəsinə əsaslanan araşdırma nəticəsində alimlər İsa Məsihin çarmıxa çəkildiyi dəqiq tarixi müəyyənləşdiriblər.

Bu barədə “The Times of India” məlumat yayıb.

Oksford Universitetinin alimləri NASA-nın 1990-cı illərdə hazırladığı modelə istinad edərək araşdırma aparıblar. Modelə maraq Pasxa bayramı ərəfəsində yenidən artıb.

Tədqiqatçılar Müqəddəs Kitabdakı "Günorta bütün yerin üstünü zülmət bürüdü və bu, üç saata qədər davam etdi" ifadəsinə diqqət çəkiblər. Mütəxəssislər bunun Ay tutulmasına işarə ola biləcəyini ehtimal ediblər.

Aparılan astronomik təhlillər nəticəsində alimlər İsa Məsihin 33-cü ilin 3 aprel tarixində çarmıxa çəkildiyini müəyyənləşdiriblər. Həmin gün Yerusəlim üzərindəki səmada Ay tutulması nəticəsində qırmızımtıl bir mənzərə yaranmış ola bilər. Bu da İncil mətnlərində "Ay qan kimi oldu" ifadəsi ilə təsvir edilib.

Alimlərin sözlərinə görə, bu hadisə Ay tutulması zamanı müşahidə edilən təbii optik hadisə – Ayın qırmızı rəngə bürünməsi ilə izah edilə bilər.