İspaniyada Kolumbiya Prezidentinin təyyarəsinə yanacaq doldurulmasından imtina edilib

Kolumbiya Prezidenti Qustavo Petronun təyyarəsinə ABŞ sanksiyaları səbəbindən İspaniyada yanacaq doldurulmasından imtina edilib.

Bu barədə İspaniyanın "El Pais" qəzeti məlumat verib.

Məlumata görə, Səudiyyə Ərəbistanına uçuş zamanı Kolumbiya Prezidenti Qustavo Petronun "Boeing 737-700" təyyarəsi yanacaq doldurmaq üçün Madriddəki Baraxas Hava Limanında texniki dayanacaq edib. Lakin bütün şirkətlər ABŞ sanksiyalarına məruz qalacaqlarından narahat olduqları üçün ona aviasiya yanacağı verməkdən imtina edib.

Bu sanksiyalar Petroya qarşı "narkotik qaçaqmalçılığında əli olma" ittihamı üzrə tətbiq edilib. Nəticədə prezident təyyarəsi alternativ yanacaq doldurma variantları axtarmağa məcbur olub.

İspaniya mediasının öz mənbələrinə istinadən xəbərinə görə, nəticədə, İspaniya hökumətinin köməyi ilə təyyarə hərbi aviabazaya yönləndirilib və orada yanacaq doldura bilib.

Kolumbiya hakimiyyəti hadisəni "qəbuledilməz" kimi qiymətləndirərək, nümayəndə heyətinin təhlükəsizliyi üçün risk yaratdığını bildirib.