İsrail-”Hizbullah” atəşkəsi sona çatdı?

İsrail Ordusu “Hizbullah”ın mövqelərini atəşə tutub. Beyruta endirilən aviazərbə nəticəsində “Hizbullah”ın qərargah rəisi Əli Əl-Tabatabai öldürülüb.

“Hizbullah” məlumatı təsdiqləyib. Qruplaşmanın bəyanatında bildirilib ki, komandirlərdən birinin öldürülməsinə baxmayaraq, onlar İsrail və himayədarı ABŞ-yə qarşı mübarizəni davam etdirəcəklər.

İsrailin hava hücumu nəticəsində “Hizbullah”ın daha 4 terrorçusu məhv edilib.

Qeyd edək ki, bu, 2024-cü ilin noyabrında əldə olunan atəşkəsdən sonra İsrailin “Hizbullah”a qarşı həyata keçirdiyi ən böyük hücumdur. Buna səbəb “Hizbullah” silahlılarının Livanın cənubuna keçib İsrailə raket təhdidi yaratmaq cəhdləridir.

İranın Xarici İşlər Nazirliyi İsrail Ordusunun Beyruta hücumunu qınayıb. Rəsmi Tehran hesab edir ki, İsrail “Hizbullah”ın qərargah rəisini öldürməklə 2024-cü ilin noyabrında əldə olunan atəşkəs razılaşmasını kobud şəkildə pozub. Çünki İsrail üzərinə götürdüyü beynəlxalq öhdəliklərə riayət etməyib.

“Bu hücumla Livanın suverenlik və ərazi bütövlüyü də pozulub”, – deyə məlumatda qeyd olunub.