İsrail kəşfiyyatı önəmli səs yazısı paylaşdı: Xəstəxanaya hücumun yeni detalları

İsrailin kəşfiyyat orqanları Qəzza zolağına yaxın ərazidə yerləşən Əl-Əhli Baptist xəstəxanasının vurulması ilə bağlı yeni iddialar səsləndirib.

Bildirilib ki, HƏMAS aviazərbənin İsrail tərəfindən həyata keçirilmədiyini anladıqdan sonra 500-dək insanın ölümünə səbəb olan hücumda “İslami Cihad” təşkilatının izlərini gizlətmək üçün qlobal media kampaniyası başlatmaq qərarına gəlib.

İsrail kəşfiyyatı iddia edib ki, əməliyyat sistemləri və peyk görüntüləri əsasında aparılan analizlər Qəzza zolağında yerləşən xəstəxananın “İslami Cihad” təşkilatının uğursuz raket atəşləri ilə vurulduğunu göstərir.

İddiaya görə, İsrailin əlində raketlərin xəstəxananın yaxınlığından atıldığını təsdiqləyən dəlillər var. Belə ki, kəşfiyyat silahlı qruplaşmanın iki üzvü arasında getdiyi iddia olunan səs yazısı paylaşıb. Həmin səs yazısında raketin xəstəxananın yaxınlığından atıldığı deyilir.

İsrail tərəfi həmçinin qeyd edib ki, münaqişə başlayandan bu günədək Qəzza zolağından atılan təxminən 450 raket trayektoriyanın düzgün təyin edilməməsi səbəbindən yenidən eyni bölgəyə düşüb ki, bunun da bədəlini mülki fələstinlilər ödəyib.