İsrail ordusu İrana zərbələr endirməkdə davam edir - Baku TV

“Tehran neft emalı zavodunun hədəfə alınmasına cavab olaraq biz Hayfa limanında neft emalı zavodunu vurduq”.

Bu barədə İslam İnqilabı Keşikçiləri Korpusu məlumat yayıb.

SEPAH-ın bəyanatında qeyd olunub ki, Hayfadakı obyektə hücum “Xeybər Şekan” raketləri ilə həyata keçirilib.

İran Ordusu eləcə də Bəhreyn Krallığına zərbələr endirib.

Ölkənin Daxili İşlər Nazirliyinin məlumatına görə, İranın raket zərbəsi nəticəsində azı üç nəfər yaralanıb. Manamanın şimal-şərqində yerləşən Mühərrək rayonunda universitet binalarından biri ciddi zərər görüb.

İsrail Müdafiə Qüvvələri isə İsfahan hava limanında “F-14” qırıcı təyyarələrini, həmçinin Hərbi Hava Qüvvələrinin təyyarələrini təhdid edən aşkarlama və müdafiə sistemlərini bombalayıb.

İsfahan vilayət rəhbərinin təhlükəsizlik üzrə müavininin sözlərinə görə, bundan əlavə, istehsalat sexi və atçılıq klubuna da hücum edilib. Nəticədə, 11 nəfər həlak olub, bir neçə nəfər isə yaralanıb.

Rəsminin sözlərinə görə, yeni zərbə dalğasında İranın 8 şəhərinə hücum təşkil edilib.