İsrail Qəzza ilə bağlı qalmaqallı planı təsdiqlədi

İsrail Müdafiə Qüvvələrinin Baş Qərargah rəisi Eyal Zamir Qəzza zolağında gələcək hərbi əməliyyatların planlaşdırılması konsepsiyasını təsdiqləyib.

Bu barədə İsrail ordusunun rəsmi teleqram kanalında məlumat verilib.

“Baş Qərargah rəisi qoşunların döyüş hazırlığının artırılmasının və ehtiyatda olan hərbçilərin hərbi xidmətə çağırışına hazırlığın, eyni zamanda yenidən qruplaşma və bərpa üçün vaxtın təmin edilməsinin vacibliyini vurğulayıb”, – bəyanatda qeyd olunub.

Xatırladaq ki, daha əvvəl İsrailin Baş naziri Benyamin Netanyahu ölkəsinin Qəzza zolağını ilhaq etmək niyyətində olmadığını bildirmişdi. O, İsrailin məqsədinin HƏMAS-ı məhv etmək və 50-yə yaxın girovu, onlardan təxminən 20-nin hələ də sağ olduğu ehtimal edilən şəxsləri geri qaytarmaq olduğunu vurğulamışdı. Netanyahunun sözlərinə görə, müharibədən sonra Qəzza zolağında “təhlükəsizlik perimetri” yaradılacaq.