İsrail Qəzzaya zərbələr endirib, yaralananlar var

İsrail Ordusunun Qəzza zolağının şimalında yerləşən Qəzza şəhərinin müxtəlif nöqtələrinə endirdiyi hava zərbələri nəticəsində iki ev və bir ticarət binası ciddi şəkildə zədələnib, məcburi köçkünlərin qaldığı təxminən 36 çadır da istifadəyə yararsız hala düşüb.

Hücumlar səbəbindən gecəni küçələrdə keçirmək məcburiyyətində qalan fələstinlilər səhər saatlarında geri döndükləri ərazilərdə böyük dağıntılarla üzləşiblər. Bölgə sakinləri fasiləsiz davam edən hücumlar fonunda "atəşkəs" barədə deyilənlərin həqiqəti əks etdirmədiyini bildiriblər.

Qahirədə atəşkəs və girov mübadiləsi ilə bağlı danışıqlar aparılsa da, Qəzzaya hücumlar davam edir və ərazidə vəziyyət verilən açıqlamalarla üst-üstə düşmür.

Beynəlxalq ictimaiyyətə müraciət edən sakinlər bildirirlər ki, daha əvvəl evlərinin yarısını və bütün əşyalarını itirmişdilər, atəşkəsdən sonra isə yenidən həyat qurmağa çalışırdılar.

"Amma bu gün görürük ki, nə atəşkəs var, nə də təhlükəsizlik", – deyə zərərçəkənlər sözlərinə əlavə ediblər.