İsrail qüvvələri niyə məhz bu əraziyə doğru irəliləyir?

İsrail Ordusuna məxsus 16 tank və 7 zirehli transportyordan ibarət hərbi kolonna Livanın Nəbatiyyə vilayətində yerləşən orta əsrlərə aid Bofor qalasına doğru irəliləyir.

Bu barədə “Al Hadath” telekanalı məlumat yayıb.

Məlumata görə, İsrail qüvvələri hücum əməliyyatı çərçivəsində 1982-2000-ci illərdə Cənubi Livanın işğalı dövründə nəzarətlərində olmuş qalaya yenidən nəzarəti bərpa etməyə çalışırlar.

Bildirilib ki, mayın 28-də “Hizbullah” silahlılarının fəaliyyət göstərdiyi qalanın ətraf əraziləri intensiv bombardmana məruz qalıb.

Arnun, Yohmur və Nəbatiyyə əl-Fauka ətrafından yaralılarla bağlı məlumatlar daxil olub. Məlumata görə, İsrail qüvvələri daha əvvəl Zaütər əş-Şərqiyyə strateji bölgəsinə nəzarəti ələ keçirərək Litani çayının şimal sahilinə çıxıblar və müqavimət ocaqlarını zərərsizləşdiriblər.

“Hizbullah” isə yaydığı bəyanatda son sutka ərzində 19 silahlı əməliyyat keçirdiyini və İsrail Ordusuna canlı qüvvə və texnika baxımından itkilər verdiyini iddia edib. Qruplaşma İsrail hərbçilərinin mövqelərinin və mexanikləşdirilmiş patrullarının Raşaf, Şamaa və Əl-Bəyad bölgələrində atəşə tutulduğunu bildirib.