Kipr problemi həll edilir? - Cenevrədəki sammitdə dünya gündəminə düşən qərar

Cenevrədə keçirilən ikigünlük sammitin iştirakçıları Kipr probleminin həllində əhəmiyyətli irəliləyiş əldə edərək adada hər iki istiqamətdə – cənubdan şimala və şimaldan cənuba hərəkət üçün dörd nəzarət-buraxılış məntəqəsini (NBM) açmağa razılaşıblar.

Bu barədə Birləşmiş Millətlər Təşkilatının Baş katibi Antonio Quterreş görüşün yekunlarına dair jurnalistlərə açıqlamasında bildirib.

O qeyd edib ki, kiprli türklərin lideri Ersin Tatar və Cənubi Kipr Prezidenti Nikos Xristodulidis qarşılıqlı etimadın gücləndirilməsinə yönəlmiş bir sıra təşəbbüslər barədə razılığa gəliblər.

Bunlara dörd NBM-in açılması, bufer zonanın minalardan təmizlənməsi üzrə səylərin artırılması, gənclər, ətraf mühitin qorunması və iqlim dəyişikliyi ilə bağlı təşəbbüslər, eləcə də qəbiristanlıqların bərpası üzrə texniki komitənin yaradılması daxildir.

“Biz iyulun sonunda bu formatda görüşün keçirilməsi barədə razılığa gəldik və mən növbəti addımları hazırlamaq üçün şəxsi nümayəndə təyin edəcəyəm”, – Baş katib əlavə edib.