Kiyevi "Kinjal"la vurdular

Rusiya Ukraynada apardığı genişmiqyaslı müharibə fonunda martın 9-da növbəti dəfə silsilə hava hücumları həyata keçirib. Bu, Ukraynanın demək olar ki, bütün vilayətlərində dağıntılara səbəb olub. Daha çox paytaxt Kiyev hədəfə alınıb.

Bunun Ukrayna paytaxtında nə qədər davam etməsi və hansı nəticələrə səbəb olması ilə bağlı şəhər hərbi administrasiyasının mətbuat katibi Mixail Şamanov Baku TV-nin Şərqi Avropa bürosuna danışıb.

"Kiyev 7 saata yaxın terrora məruz qaldı. Bu müddət ərzində rasistlər hava silahlarının demək olar ki, bütün növlərindən istifadə etdilər. "Şahid" dronlarından tutmuş bütün növ qanadlı raketlərə qədər buraxdılar. Ukrayna hava hücumundan müdafiə sistemlərinin işi sayəsində paytaxta qanadlı raketlər və “Şahidlər”lə hücumların qarşısı alındı. Təəssüf ki, "Kinjal" tipli aeroballistik raketin qarşısını ala bilmədik. Qoloseyevski rayonundakı bir infrastruktur obyektini, həmçinin Svyatoşinski rayonunda bir evi "Kinjal"la vurdular. 3 nəfər xəsarət alıb. Birinə dərhal yerindəcə tibbi yardım göstərilib, daha iki nəfər xəstəxanaya yerləşdirilib", - deyə M.Şamanov qeyd edib.