Kiyevlə Ottava 100 illik bəyannamə imzalayıb

Ukrayna Prezidenti Volodimir Zelenski və Kanadanın Baş naziri Mark Karni 100 illik tərəfdaşlıq haqqında Bəyannamə və bir sıra digər ikitərəfli sənədlər imzalayıblar.

Bu barədə birgə bəyanatda qeyd olunub.

"Bu sənədlə ölkə liderləri dövlətlər arasında iqtisadi, siyasi və təhlükəsizlik sahəsində tərəfdaşlıq və əməkdaşlığın dərinləşdirilməsi, eləcə də Ukraynada ədalətli və davamlı sülhün dəstəklənməsi məqsədilə 100 illik tərəfdaşlıq haqqında saziş bağlamağı öhdələrinə götürüblər", – deyə bəyanatda bildirilib.

Liderlər Ukraynanın təhlükəsizliyinin Avro-Atlantik təhlükəsizliyin ayrılmaz hissəsi olduğunu, Ukraynanın gələcəyinin isə NATO-da olduğunu təsdiqləyib, həmçinin Aİ və NATO-ya tamhüquqlu üzvlük yolunda Ukrayna islahatlarının davam etdirilməsinin vacibliyini vurğulayıblar.

Kanada və Ukrayna həmçinin kəşfiyyat, kibermüdafiə, PUA-lara qarşı mübarizə və elektron basdırma vasitələri, eləcə də hibrid təhdidlərə və xarici informasiya manipulyasiyasına qarşı mübarizə sahələrində əməkdaşlığı dərinləşdirəcəklər.

Ölkələr pilotsuz sistemlərin, pilotsuz uçuş aparatları əleyhinə vasitələrin və döyüş sursatlarının birgə istehsalı üçün uzunmüddətli müdafiə sənayesi tərəfdaşlığı yaradacaqlar. Tərəfdaşlıq 24 avqust 2025-ci il tarixində Kiyevdə imzalanmış birgə istehsala dair Niyyət məktubu əsasında inkişaf edəcək və tədqiqatları, eləcə də texnologiyaların ötürülməsini nəzərdə tutacaq.