Əkiz qüllələrdə ölənlərin xatirəsi Pentaqonda anılıb
2001-ci il sentyabrın 11-də ABŞ-də baş tutan terror aktından 24 il ötür.
Rəsmi məlumata əsasən, həmin gün səhər saatlarında “Boeing 767” tipli iki təyyarə Ümumdünya Ticarət Mərkəzinin 110 mərtəbəli qoşa binalarına, “Boeing 757” tipli üçüncü təyyarə Vaşinqtonda yerləşən ABŞ Müdafiə Nazirliyinin binasına çırpılıb.
Əkiz qüllələrə hücum nəticəsində 2750, təyyarənin Pentaqona çırpılmasından sonra isə 184 nəfər həlak olub. Dördüncü təyyarənin sərnişinləri terrorçulara qarşı çıxıb və “Boeing 757” Pitsburq yaxınlığında yerə çırpılıb. 40 sərnişin və ekipaj üzvləri ölüb. Terror aktlarına görə məsuliyyəti “Əl-Qaidə” öz üzərinə götürüb.
Terror aktı nəticəsində Nyu-York şəhərinə dəyən zərərin ümumi həcmi 36 milyard dollar təşkil edib. Əkiz qüllələrin dağıntılarının təmizlənməsi isə 8 aydan çox vaxt aparıb. Pentaqonun binasının dağılmış qərb hissəsi 2002-ci ilin sentyabr ayında bərpa olunub.
Qeyd edək ki, 11 sentyabr qurbanlarının xatirəsi Vaşinqtonda yad edilib. Hücumların ildönümü münasibətilə Pentaqonun binasından Amerika bayrağı asılıb və həlak olanların xatirəsi bir dəqiqəlik sükutla anılıb.
