Koçaryanın Sarkisyana dəstəyi niyə işə yaramadı | Paşinyana qarşı plan

Ermənistanın keçmiş prezidenti Serj Sarkisyan və komandası Baş nazir Nikol Paşinyana qarşı impiçment planını həyata keçirə bilmir.

Bu barədə “Hraparak” qəzeti məlumat yayıb.

“Aylardır impiçmentlə bağlı nağara çalan və “Ermənistan” blokunun bu təşəbbüsə qoşulmamasını Paşinyanın vəzifəsindən kənarlaşdırılmasına yeganə maneə hesab edən Serj Sarkisyanın komandası bir neçə gün əvvəl istədiyi imzaları ala bildi, amma o vaxtdan bu addımla bağlı heç bir məlumat yoxdur.

Məsələ burasındadır ki, “Şərəfim var” blokunun impiçment layihəsini parlamentdə dövriyyəyə buraxmaq üçün 36 imzası belə yoxdur. İki müxalifət fraksiyasının birlikdə 34 imzası var”, ‒ nəşr bildirib.

“Hraparak”ın məlumatına görə, son günlər “Şərəfim var” fraksiyasının baş nazir namizədi Davit Ambarsumyan hakim partiyadan ayrılaraq MAS Partiyasını yaradan müstəqil deputatlar Ovik Ağazaryan və Akop Aslanyanın imzalarını almağa çalışır:

“Məsələnin parlamentdə müzakirəyə çıxarılması üçün ən azı 36 imza toplanmalıdır, qəbul olunması üçün 54 deputat onun lehinə səs verməlidir. Bu isə hakim fraksiyadan dəstək olmadan mümkün deyil. Srağagün Davit Ambarsumyan və Ağazaryan yenidən İrəvandakı kafelərin birində görüntülənib, amma Ağazaryan bir millimetr də mövqeyindən əl çəkməyib”.

Ovik Ağazaryan və Akop Aslanyan hökumətin keçmiş xüsusi nümayəndəsi Edmon Marukyanın namizədliyini irəli sürüb. Sarkisyanın komandası isə Marukyanı “İkinci Nikol” adlandıraraq bu təklifdən imtina edib.