Kosova Prezidentindən ABŞ barədə qalmaqallı açıqlama | Balkanlarda diplomatik böhran

ABŞ, Kosovo və Serbiyadan ibarət "Balkan üçbucağı"nda ciddi siyasi qalmaqal yaranıb. Buna səbəb Kosovo Prezidenti Vosa Osmaninin bəyanatıdır.

O iddia edir ki, ABŞ Prezidenti Donald Tramp yaxın keçmişdə Belqradın Priştinaya qarşı həyata keçirmək istədiyi aqressiv planın qarşısını alıb.

ABŞ Prezidentinin xüsusi nümayəndəsi Riçard Qrenell Vosa Osmanini Donald Trampın sözlərini manipulyasiya etməkdə ittiham edib.

Onun sözlərinə görə, Osmani tərəfindən səsləndirilən "Serbiyanın Kosovo əleyhinə yeni eskalasiyasının qarşısını Tramp aldı" fikri həqiqəti əks etdirmir.

Kosovo Prezidentinin bəyanatını Belqrad da qəti şəkildə təkzib edib. Prezident Aleksandar Vuçiç bəyan edib ki, Serbiya Kosovoya qarşı nə bir əsgər yeridib, nə də hərbi texnika göndərib.

Lakin Vosa Osmani mövqeyində israrlıdır və sübutlar təqdim edəcəyini bildirir.

Balkan mətbuatının yazdığına görə, iyun ayının ortalarında Tramp sosial şəbəkədə yazıb ki, onun prezidentliyinin birinci dönəmində Kosovo və Serbiya ağır münaqişəyə doğru irəliləyirdi və müharibənin astanasında idilər. Lakin o, bunu dayandıra bilib.

Ayın sonunda jurnalistlərlə söhbətində isə Tramp deyib ki, ABŞ son aylarda bir neçə münaqişənin, o cümlədən Serbiya ilə Kosovo arasındakı qarşıdurmanın qarşısını alıb.

Görünür, ABŞ–Kosovo–Serbiya üçbucağında yaranmış siyasi qalmaqal Tramp şəxsən bu məsələyə aydınlıq gətirməyincə, davam edə bilər.