Kral pinqvinlərin həyatı təhlükədə | Canlıların dənizə çıxışı bağlana bilər?

03 iyun 2025 321 baxış

Getdikcə artan qlobal istiləşmə planetimizin simasını dəyişməyə davam edir.

Hazırda Cənubi Corciya adasına yaxınlaşan A23a aysberqi iqlim sistemində baş verən dəyişikliklərin narahatedici siqnalıdır.

Çəkisi bir trilyon tonu aşan və onmərtəbəli bina hündürlüyündə olan bu buz nəhəngi peyklər vasitəsilə diqqətlə izlənilir, çünki onun sahilə yan alması yerli ekosistem üçün fəlakətli nəticələrə gətirib çıxara bilər.

Cənubi Corciya adası kral pinqvinlərinin koloniyaları və cənub dəniz fillərinin yaşayış yeridir. A23a bu canlıların dənizə çıxışını bağlaya bilər. Keçmişdə baş vermiş bu kimi hadisələr kütləvi aclığa və lokal ekosistemin çökməsinə səbəb olmuşdu.

Alimlər həmçinin aysberqin yaxın zamanlarda parçalanaraq daha kiçik hissələrə bölünəcəyini proqnozlaşdırıblar. Lakin bu fraqmentlər belə təhlükəlidir.

Onların hərəkəti qeyri-müəyyən olur, bu isə həm dəniz canlılarına zərər verə, həm də gəmiçilik üçün risklər yarada bilər.

#Qlobal istiləşmə