Lukaşenko Trampla anlaşa bilsə... | Belarus müxalifəti niyə narahatdır?

Münhen Təhlükəsizlik Konfransında Svetlana Tixanovskaya bir sıra beynəlxalq rəsmilər və ABŞ nümayəndələri ilə görüşlər keçirib, ancaq Belarus müxalifətinin narahatlığı artmaqdadır.

Buna səbəb rəsmi Vaşinqtonun artıq Minsklə danışıqlar aparması barədə “The New York Times”da çıxan məqalədir. Belaruslu müxalifətçilər bunu şiddətlə müzakirə edirlər və Aleksandr Lukaşenkonun Donald Trampla anlaşacağı təqdirdə Belarusda vəziyyətin ürəkaçan olmayacağını düşünürlər.

Nəşrin müəllifi bildirir ki, Belarus banklarına qarşı sanksiyaların yumşaldılması və kalium gübrələrinin ixracı müqabilində müxalifətçilərin dəmir barmaqlıqlar arxasında kütləvi şəkildə azad edilməsinə hazırlıq gedir.

14-16 fevralda keçirilən Münhen Təhlükəsizlik Konfransında Belarus müxalifətinin lideri Svetlana Tixanovskaya panel müzakirəsində iştirak edib və tədbir çərçivəsində görüşlər keçirib.

Onun görüşlərində əsas mövzu Belarusdakı penitensiar müəssisələrdə olan müxalifətçilərin azadlığa buraxılması uğrunda mübarizə məsələsi olub.

S.Tixanovskaya bu mövzunu BMT-nin insan haqları üzrə ali komissarı Volker Türklə də müzakirə edib.

S.Tixanovskayanın baş müşaviri Franak Vyaçorka müxalifətin onlayn resurslarından birinə deyib:

“S.Tixanovskaya Belarus hüquq müdafiəçilərinin son repressiya dalğası, həbsxanalardakı vəziyyət və ağır durumda olan siyasi məhbuslar barədə sənədlər təqdim edib. O, vəziyyətin fəlakətli olduğunu və təcili müdaxilə tələb etdiyini vurğulayıb”.

F.Vyaçorkanın sözlərinə görə, S.Tixanovskaya həmsöhbətini siyasi məhbusların azadlığa buraxılmasını təşviq etməyə, ünsiyyətsiz təcrid praktikasına son qoymağa və məhbuslara çıxışı təmin etməyə çağırıb.