Mahsun Kırmızıgülün xəstəxanaya müraciət etməsinin səbəbi | Məşhur sənətçinin son vəziyyəti

Qısa müddət ərzində həm anasını, həm ögey anasını, həm də yaxın dostunu itirən məşhur sənətçi Mahsun Kırmızıgül yaşadığı güclü stresin ardından ürək döyüntülərinin artması səbəbi ilə xəstəxanaya müraciət edib.

Bütün bu emosional yüklənmə və stres nəticəsində M.Kırmızıgül ötən günlərdə ürək çırpınması şikayəti ilə İstanbul Bakırköy Dr. Sadi Konuk Tədris və Araşdırma Xəstəxanasına müraciət edib. Xüsusilə Volkan Konakın səhnədə qəfil infarkt keçirməsi və dünyasını dəyişməsi M.Kırmızıgülü öz səhhətini ciddiyə almağa vadar edib.

"Milliyet" qəzetinin xəbərinə görə, Kardiologiya şöbəsində aparılan yoxlamalar nəticəsində sənətçinin səhhətində ciddi bir problem olmadığı müəyyən edilib. Hətta xəstəxanadan çıxmazdan əvvəl onu müayinə edən tibb işçilərinin xatirə fotosu istəklərini də geri çevirməyib.

Son vaxtlar yaşadığı itkilərlə medianın diqqət mərkəzində olan Mahsun Kırmızıgülün bir müddət dincələrək mənəvi gücünü bərpa etməyə çalışacağı bildirilir.

Qeyd edək ki, Mahsun Kırmızıgülün 99 yaşlı anası Faike Arık 2024-cü ilin 6 dekabrında vəfat edib. Bu itkidən qısa müddət sonra isə ögey anası Zühre Bazencir dünyasını dəyişib.

Duyğularını sosial şəbəkədə bölüşən M.Kırmızıgül “İçim yanır” sözləri ilə kədərini ifadə edib. Lakin itkilər bununla bitməyib. M.Kırmızıgül ustad sənətçi Edip Akbayramın və daha sonra çox yaxın dostu Serşat Erbilginin ölüm xəbərləri ilə bir daha dərin hüzn yaşayıb.