Azərbaycanla demoqrafik fərq Ermənistanı narahat edir - Baku TV

“Ermənistanın real təhlükəsizlik təminatı hər hansı dövlətin himayəsində deyil, qonşularla sülhün əldə olunmasında və davamlı sabitliyin təmin edilməsindədir”.

Bunu Baku TV-yə açıqlamasında millət vəkili Rizvan Nəbiyev deyib.

Onun sözlərinə görə, uzun illər Rusiyanın himayəsində olan Ermənistan bu gün yol verdiyi səhvlərin nəticələrini müxtəlif sahələrdə hiss edir.

Rizvan Nəbiyev qeyd edib ki, Azərbaycana qarşı ərazi iddiaları və işğalçılıq siyasəti təkcə iki dövlət arasındakı münasibətlərə deyil, bütövlükdə regionun təhlükəsizliyinə ciddi zərbə vurub. Onun fikrincə, Azərbaycanın regionda yaratdığı yeni siyasi reallıq Ermənistan üçün də real təhlükəsizlik təminatı formalaşdırır.

Deputat vurğulayıb ki, sülh müqaviləsinin imzalanması, ratifikasiyadan sonra onun icrasının sürətləndirilməsi, iqtisadi əməkdaşlığın genişləndirilməsi, nəqliyyat-kommunikasiya əlaqələrinin qurulması və etimad tədbirlərinin həyata keçirilməsi Ermənistanın təhlükəsizliyinin əsasını təşkil edə bilər.

O həmçinin Ermənistanın Türkiyə ilə münasibətlərini normallaşdırmasının vacibliyini diqqətə çatdırıb. Bildirib ki, ölkənin coğrafi mövqeyi və mövcud reallıqlar həm Azərbaycan, həm də Türkiyə ilə münasibətlərin normallaşdırılmasını zəruri edir. Azərbaycanın regionda yaratdığı yeni siyasi şərait isə bunun üçün unikal imkan yaradır.