Makron növbəti seçkilərdə iştirak edə bilməyəcək | Fransua Olland

Fransada makronizm erası bitmək üzrədir.

Bunu Fransanın keçmiş prezidenti Fransua Olland “Frans Press” agentliyinə müsahibəsində deyib.

“Makronizm əgər mövcud olubsa, artıq bitib”, – deyə o qeyd edib.

Sabiq prezident bildirib ki, E.Makronun mandatı bitməyib, lakin o, artıq növbəti seçkilərdə iştirak edə bilməyəcək.

“E.Makron hakimiyyətə gələndə Fransa siyasətinin artıq sağ və sol arasında bölünməyəcəyini bəyan etmişdi. Artıq siyasətdə təcəssüm etdiyi dövr bitdi”, – deyə F.Olland əlavə edib.

2017-ci ildə son dərəcə aşağı reytinqinə görə 2-ci müddətə namizəd olmaqdan imtina edən F.Olland böyük siyasətə qayıtmağa cəhd etmək niyyətindədir. O, əvvəllər Tul kommunasının deputatı və meri olduğu Korrez departamentində solçu “Yeni Xalq Cəbhəsi” alyansından növbədənkənar parlament seçkilərində iştirak etmək qərarına gəlib.

Qeyd edək ki, iyunun 9-da Fransa Prezidenti Emmanuel Makron Avropa Parlamentinə keçirilən seçkilərdə tərəfdarlarının məğlubiyyəti fonunda Milli Assambleyanı buraxmaq qərarına gəlib. Növbədənkənar seçkilərin birinci turu iyunun 30-da, ikinci turu isə iyulun 7-də keçiriləcək.