Makronla Baş nazir arasındakı narazılıqlar | Fransada siyasi böhran səngimir

Fransada parlament seçkilərindən sonra baş qaldıran siyasi böhran səngimək bilmir.

Ölkə Prezidenti Emmanuel Makron parlamentin etimadsızlıq səsverməsindən sonra Baş nazir Mişel Barnyenin istefa ərizəsini qəbul etmiş və bundan sonra hökumətin qurulması vəzifəsini “Demokratik Hərəkat” Partiyasının lideri Fransua Bayruya həvalə etmişdi.

F.Bayru kifayət qədər təcrübəli və iddialı siyasətçidir və E.Makronun onunla işləməkdə çətinlik çəkəcəyi əvvəlcədən bəlli idi.

E.Makronun istəyi hökuməti öz nəzarətində saxlamaq, onun prezident seçilməsi üçün pul xərcləyən ağalarının arzuladıqları şəxsləri strateji nazirliklərin başına gətirməkdir. O, bundan əvvəlki baş nazirlərin dövründə bu siyasəti həyata keçirib. Söz yox ki, həmin şəxslərin yalnız adı Baş nazir idi, hökumətə faktiki rəhbərliyi elə Prezident E.Makronun özü edirdi.

Əsas mübahisə doğuran məsələ ölkənin gələcək baş diplomatının kimliyi ilə bağlıdır. Xarici işlər naziri vəzifəsini yerinə yetirən Baş nazirin partiya yoldaşı Jan-Noel Barronun bu vəzifəyə rəsmi təsdiq edilməsi Prezident tərəfindən qəbul edilmir.

E.Makron bu vəzifəyə çoxdankı müttəfiqi və keçmiş daxili işlər naziri Jerald Darmaninin gətirilməsinə çalışır. Ancaq F.Bayru Prezidentin adamının xarici işlər naziri olmasını istəmir. O, E.Makronun bu günə qədərki xarici və təhlükəsizlik siyasətini sərt tənqid edir və keçirilən tədbirləri yanlış adlandırır. Onun Fransanın ənənəvi xarici siyasətində dəyişiklik etmək cəhdləri Yelisey sarayı tərəfindən qəbul edilmir.

Prezident və Baş nazirin arasındakı daha bir narazılıq isə müdafiə nazirinin təyinatı ilə bağlıdır. F.Bayru bu vəzifəyə Sebastyan Lekornunu gətirmək istəyir. Lakin E.Makron onun da namizədliyi ilə razılaşmır.

Prezidentin istəyi Jerald Darmaninin xarici işlər naziri təyinatına razılıq verilməsi müqabilində S.Lekornunun müdafiə naziri təyin edilməsidir.

Görünür, Emmanuel Makron Fransa tarixi üçün rüsvayçılıq olan xarici siyasət kursundan əl çəkmək istəmir və məhz buna görə də öz adamını xarici işləri naziri postuna gətirmək istəyir.

İstənilən halda F.Bayru dövrü E.Makron üçün asan keçməyəcək. Baş nazir elə ilk addımda Prezidentə gücünü göstərərək onu yerinə oturtmağı bacarıb.