Media oxucularını təəccübləndirən xəbər | Ukraynalı hərbi ekspertdən maraqlı açıqlama

“Ukraynada qadınların bəziləri ərini hərbi komissarlığa təhvil verib və əvəzində pul mükafatı alıb”.

Sosial medianın Ukrayna seqmentində bu tip xəbərlərə hər ötən gün daha çox rast gəlinir. Hətta “Ərini orduya göndər, əvəzində mükafat al” başlıqlı paylaşım da mediada sürətlə tirajlanır.

Bəziləri bununla ukraynalı kişilərin müharibədən qaçıb gizləndiyi məsələsini qabardır, bəziləri də qadınların bunu pul üçün etdiyini qeyd edirlər.

Məsələ ilə bağlı ukraynalı hərbi ekspert Aleksandr Kovalenka Baku TV-yə açıqlamasında bildirib ki, hazırda ölkədə ordu, səfərbərlik və müharibə çox həssas mövzulardandır. Ona görə də belə xəbərləri ciddiyə almamaq lazımdır:

“Bu, birmənalı olaraq qarşı tərəfin propaqandasıdır. Qloballaşan dünyada xəbərləri internet üzərindən yaymaq çox güclü alətə çevrilib. Məqsədyönlü şəkildə Ukrayna cəmiyyətində ordudan yayınma hallarını qabardaraq kişilərin cəbhəyə getməkdən çəkindiyi fikri formalaşdırılır. Əfsuslar olsun ki, konstitusiyamızın üzünü heç açmayan və vətənə borcunu unudan insanlar var. Ordudan da yayınma hallarına rast gəlinir.

Bu tərz xəbərlər və videoların yayılmasında xüsusi bir məqama diqqət yetirmək istəyirəm. İcazənizlə sizə bildirim ki, bütün bu foto, video və məlumatlar eyni yerdən maliyyələşən insanların havadarlığı ilə yayılır. Sadəcə olaraq onu deyim ki, “ərini ver, pul qazan” xəbərləri yumordan başqa bir şey deyil. Çünki Ukrayna hərbi komissarlığında yoldaşlarını təhvil verən qadınlara heç kim pul ödəməyəcək.

Bu, sadəcə hüquq çərçivəsində öz əksini tapmayan fikirlərdən biridir. Amma məsələnin ən məyusedici tərəfi ondan ibarətdir ki, bu manipulyasiyalara uyanlar bizim də cəmiyyətdə var və onlar özləri də bilmədən bu təbliğatın sürətlə yayılmasına xidmət etmiş olurlar".

Xatırladaq ki, Rusiya-Ukrayna müharibəsi 2 ildən çoxdur davam edir.