Məhəmməd peyğəmbər barədə bu filmi çəkən rejissor ölkədən qovuldu | ARAŞDIRMA

1976-cı ildə Mustafa Akkadın rejissorluğu ilə çəkilən və Məhəmməd peyğəmbərin həyatını əks etdirən “Çağırış” filmi bütün dünyada böyük rezonans doğurur.

Filmin ssenarisi Misirin Əl-Əzhər Universitetinin alimləri ilə hazırlanır, həm sünni, həm də şiə məzhəblərinin nümayəndələri tərəfindən təsdiqlənir. Əsas mübahisə predmeti isə peyğəmbərin ekranda necə göstərilməsi ilə bağlı olur və yalnız onun baxış bucağından çəkilişin aparılması qərara alınır.

Çəkilişlər əvvəlcə Mərakeşdə aparılsa da, Səudiyyə Ərəbistanının təzyiqi ilə yarımçıq qalır. Daha sonra Müəmmər Qəddafinin dəstəyi ilə filmin davamı Liviyada çəkilir.

“Çağırış” iki dildə – ərəb və ingilis versiyalarında, ayrı-ayrı aktyorlarla ərsəyə gətirilir. Çətin şəraitdə, səhrada gedən çəkilişlər zamanı həm texniki problemlər, həm də emosional anlar yaşanır. Xüsusilə “Həmzə”nin ölüm səhnəsi və “Bilal”ın ilk dəfə azan səsləndirməsi izləyicilərə böyük təsir bağışlayır.

“Çağırış”ın nümayişinə İslam ölkələrində qadağa qoyulduğu üçün film Londonda təqdim edilir, sonradan isə sözügedən məhdudiyyətlər aradan qaldırılır. Film həm islam dünyasında, həm də Qərbdə böyük əks-səda doğurur və 40 il sonra – 2018-ci ildə Səudiyyə Ərəbistanında da nümayişinə icazə verilir.