Meloni İtaliyanın şərtlərini açıqladı | HƏMAS bunu etsə...

"HƏMAS silahı yerə qoymayana qədər İtaliya Fələstini dövlət kimi tanımayacaq".

Bunu İtaliyanın Baş naziri Ciorcia Meloni Senatdakı çıxışında deyib.

O, ABŞ Prezidenti Donald Trampın təqdim etdiyi və Şarm əl-Şeyxdə imzalanan 20 bəndlik planın bölgə üçün müsbət bir inkişaf olduğunu bildirib.

“Bu mühüm addımı mümkün edən diplomatik səylərə görə bütün vasitəçilərə dərin minnətdarlığımızı bildiririk. Misir, Qətər və Türkiyə hökumətlərini, xüsusilə bu danılmaz uğura nail olmaq üçün fövqəladə enerji sərf edən Donald Trampı nəzərdə tuturam. Uzun müddətdən sonra Yaxın Şərqdə ədalətli və davamlı sülhün bərqərar olması üçün etibarlı bir imkan var, lakin vəziyyət hələ də kövrəkdir. Sülh planının məqsədlərinə çatmaq üçün HƏMAS keçid administrasiyasında və Fələstin Dövlətində heç bir rolunun olmayacağını qəbul etməli və tərk-silah olmalıdır. Bunlar həm də İtaliyanın Fələstin Dövlətini tanıması üçün zəruri ilkin şərtlərdir”, – deyə Ciorcia Meloni vurğulayıb.