“Mən müharibəni başladan ölkəyə gedə bilmərəm” | Volodimir Zelenski

Ukrayna Prezidenti Volodimir Zelenski “Financial Times” qəzetinin 24 fevralda prezident seçkiləri və referendum elan etməyi planlaşdırdığı barədə xəbərini təkzib edib.

O, jurnalistlərin suallarını cavablandırarkən qeyd edib ki, bu cür planlar barədə məlumatı ilk dəfə mediadan eşidib.

Zelenski həmçinin vurğulayıb ki, bütün zəruri təhlükəsizlik təminatları təmin edildikdə seçkilərə davam ediləcək.

“Biz seçkilərə hazırıq. Buna nail olmaq çox asandır. Atəşkəs elan edilən zaman seçkilər keçiriləcək”, – deyə Ukrayna lideri bildirib.

O həmçinin Rusiya ilə danışıqlar məsələsinə toxunaraq, Moskvada görüş keçirməyəcəyini vurğulayıb.

“Mən bu müharibəni başladan ölkənin paytaxtına gedə bilmərəm. Biz ABŞ-nin təkliflərini dəstəkləməyə, Amerikanın istənilən ərazisində, Avropada, təbiki Rusiya və Belarus istisna olmaqla istənilən dövlətdə görüşməyə hazırıq”, – deyə Zelenski bildirib.

Ukrayna lideri hesab edir ki, ABŞ və Avropa Ukrayna ilə birlikdə hərəkət etməlidir.

“Əgər onlar ayrı-ayrılıqda Rusiya ilə işləsə, bundan yalnız Rusiya faydalanacaq. Amerika və Avropa birlikdə daha güclüdür”, – deyə o qeyd edib.

Müharibənin nə vaxt başa çata biləcəyi ilə bağlı suala cavab verən Zelenski bildirib ki, bu, təkcə Ukraynadan deyil, həm də Rusiyaya təzyiq göstərəcək ABŞ-dən asılıdır.