Miqrantlara təcili xəbərdarlıq | Rusiya Dövlət Duması yeni qanun qəbul edəcək

Rusiya Dövlət Duması miqrantlar haqqında yeni qanunu dəstəkləyəcək.

Bu barədə Dövlət Dumasının sədri Vyaçeslav Volodin məlumat verib.

Bildirilib ki, qəbul ediləcək sənəddə müxtəlif ölkələrin vətəndaşlarının hansı hallarda Rusiya ərazisindən çıxarılacağı açıq şəkildə göstərilib.

Bunlar ictimai qaydanın pozulması, müxtəlif xarakterli inzibati xətaların törədilməsi, müvafiq icazə olmadan əmək fəaliyyəti ilə məşğul olmaq, miqrantların qeydiyyatı üçün müəyyən edilən müddətin bitməsi, sərhəd-buraxılış məntəqələrindən keçid qaydalarının pozulması, səfərin məqsədlərindən kənar fəaliyyətlə məşğul olmaq, Rusiya Federasiyasının ərazisində yaşayış hüququ verən sənədlərin itirilməsi, yaşayış üçün nəzərdə tutulan müddətin başa çatması və ekstremizmə yönələn açıq çağırışlardır.

Qeyd edək ki, hazırda qüvvədə olan qanunvericiliyə görə, sözügedən qayda pozuntularına yol verən miqrantlar öz ölkələrinə yalnız məhkəmənin qərarından sonra göndərilə bilər. Sənədin qəbulundan sonra isə qanunun təşəbbüskarı olan Daxili İşlər Nazirliyi bu cəza tədbirini müstəqil şəkildə tətbiq edə biləcək.