Mitinqləri vəhşicəsinə yatırdı | Zaxarovadan Fransa ilə bağlı sərt açıqlama

“Rusiya Fransa hüquq-mühafizə orqanlarının və hərbçilərinin Yeni Kaledoniyada yerli əhaliyə qarşı tətbiq etdiyi metodların qəbuledilməzliyini dəfələrlə qeyd edib”.

Rusiya Xarici İşlər Nazirliyinin rəsmi nümayəndəsi Mariya Zaxarova “news.ru”nun sualına belə cavab verib.

O əlavə edib ki, beynəlxalq ictimaiyyət dekolonizasiya prosesinin başa çatmadığını görür:

“Xatırlatmaq istərdim ki, bu ilin may ayında arxipelaq Fransanın yeni qanunlarına qarşı çıxan minlərlə sakinin etiraz aksiyaları ilə gündəmi zəbt etmişdi. Paris bir daha bəyan edilmiş insan hüquqları və söz azadlığı dəyərlərindən uzaqlaşdığını nümayiş etdirdi. Fransa hakimiyyəti mitinqləri vəhşicəsinə yatırtdı. Əlbəttə ki, bu, itkisiz baş tutmadı.

Fransa başqa ölkələrdəki seçkilərlə bağlı qiymətləndirmələrində obyektiv deyil. Görün, Paris bu və ya digər ölkədə keçirilən seçkiləri hansı narahatlıq, təşviş və aşkar manyaklıqla qiymətləndirir, dünyanın bu və ya digər regionunda söz azadlığının vəziyyətinə necə qiymət verir. Bu da onların öz sözləri ilə desək, cavabdeh olduqları ərazidir. Görün, orada nə baş verir. Onlar etdiklərinə görə cavab verməyə hazır deyillər".

Mariya Zaxarova əlavə edib ki, Fransanın dənizaşırı ərazilərində sosial-iqtisadi gərginlik davam edir və Fransa hakimiyyəti problemlərin əsas səbəbini aradan qaldırmaq əvəzinə kütləvi siyasi repressiyalar həyata keçirmək qərarına gəlib.