Moskvanın Paşinyanla bağlı gizli planı

Rusiyanın “Vaqner” özəl hərbi şirkətinin sabiq rəhbəri Yevgeni Priqojinin ölümündən əvvəl Ermənistanda 3000-ə yaxın “vaqnerçi” olub.

Bu barədə Ermənistanın hökumətyönümlü “Baqramyan 26” “Telegram” kanalı məlumat yayıb.

Məlumata görə, son zamanlar onlara əsasən Rostov şəhərindən olan və əksəriyyəti etnik ermənilərdən ibarət 2000-ə yaxın müqaviləli əsgər qoşulub.

“Ermənistanın Baş naziri Nikol Paşinyanın Rusiyanı strateji tərəfdaş kimi seçməyin səhv addım olması və Rusiya rəhbərliyini Qarabağ məsələsində razılaşmalara əməl etməməkdə ittiham etməsi ilə bağlı son açıqlamalarını nəzərə aldıqda məlum olur ki, Kreml Ermənistanda dövlət çevrilişi ssenarisinə razılıq verib”, – deyə kanal yazıb.

İddia olunur ki, Kremlin planının əsas məqsədi ölkədə mövcud olan “Vaqner” döyüşçülərindən istifadə etməklə N.Paşinyan və onun komandasını hakimiyyətdən uzaqlaşdırmaqdır. Həmçinin əlavə edilib ki, Ermənistan-ABŞ hərbçilərinin birgə təlimləri Rusiya rəhbərliyinin səbir kasasını daşdıran “son damla” olub.

İddiaya əsasən, hazırda Ermənistanda “vaqnerçi”lərin sayı 12 min nəfərə çatıb və onlara hərəkətə keçmək əmri verilib. Rusiya əsasən xeyli agentlərinin olduğu Ermənistan Ordusunun, kəşfiyyat xidmətlərinin və polisinin yüksək rəhbərliyinə arxalanır, çünki orta və aşağı səviyyələrdə Rusiyaya dəstək çox zəifdir.

O da qeyd edilib ki, hazırda N.Paşinyanı əvəz etmək üçün Rusiyanın layiqli namizədləri yoxdur. Həm də İrəvan və onun ətrafında çoxsaylı hərbi birləşmələrin mövcudluğu N.Paşinyanı devirmək məsələsində uğur ehtimalını xeyli dərəcədə azaldır.