Müdafiə naziri Britaniyaya qayıda bilmədi | Rusiyadan hücum müəmması
Böyük Britaniyanın müdafiə naziri Qrant Şappsın təyyarəsindəki siqnal Polşadan ölkəsinə qayıdarkən 30 dəqiqə müddətinə bloklanıb.
Bu müddət ərzində mobil telefonlar internetə qoşula bilməyib. Buna görə də pilotlar təyyarənin yerini müəyyən etmək üçün alternativ üsullardan istifadə etmək məcburiyyətində qalıblar. Yaranan nasazlıqda isə London Rusiyanı şübhəli bilib.
Bu barədə hökumətdəki mənbəyə istinadla “Times”, “Guardian” və “Daily Telegraph” kimi nəşrlər məlumat yayıb.
Bildirilib ki, siqnal hava gəmisinin Rusiyanın Kalininqrad şəhəri yaxınlığından keçərkən itib.
Q.Şappsın mətbuat katibi isə bildirib ki, yaranan vəziyyət onlarda şübhələr oyadıb:
“Biz burada cənab nazirin özünün hədəf olub-olmadığı barədə əminliklə söz deyə bilmirik. Çünki o, Polşaya rəsmi səfəri zamanı Vladimir Putinin Ukraynadakı əməliyyatlarını pisləyib və onun oradan çıxmalı olduğunu bildirib”.
Qeyd edək ki, Böyük Britaniyanın Müdafiə Nazirliyi vəziyyəti rəsmi şərh etməkdən imtina edib.