NATO və Rusiya toqquşmaya yaxınlaşır? | Polşaya hücumun məqsədi nədir?

ABŞ Prezidentinin Ukrayna məsələləri üzrə xüsusi nümayəndəsi Kit Kelloq Rusiya pilotsuz uçuş aparatlarının Polşa ərazisinə hücumunu təsadüf hesab etməyib. Bundan başqa, o bildirib ki, Ukrayna müharibədə uduzmayacaq.

Onun sözlərinə görə, Rusiya Prezidenti Vladimir Putin məqsədli hərəkət edir, o, siqnal göndərir və cavab eşitmək istəyir. "Əgər biz tarixdən dərs çıxarmasaq, o zaman Üçüncü Dünya müharibəsinə doğru irəliləyəcəyik", ‒ deyə ABŞ rəsmisi bildirib.

Kelloqun açıqlamasından o da aydın olur ki, Rusiya dronlarını Polşa ərazisinə məqsədli şəkildə göndərib. Bu isə 2 mühüm məsələ ilə bağlı ola bilər. Birincisi, Kreml NATO-nun daxilində parçalanma yaratmaq niyyətindədir.

Uzun müddətdir ki, Şərqi Avropanın təhlükəsizliyi ciddi müzakirə mövzusudur. İddia edilir ki, NATO Şərqi Avropanın qorunmasında üzərinə düşən vəzifəni yerinə yetirə bilmir. Buna görə də Fransa başda olmaqla bəzi Avropa ölkələri "köhnə qitə"nin öz müstəqil ordusunun yaradılması fikrini dəstəkləyir. Bu isə ABŞ-nin Avropa üzərində hərbi təsirinin yox olması anlamına gəlir. Rusiya isə bundan istifadə edib ABŞ-Avropa hərbi ittifaqının dağılmasına nail olmaq istəyir.

İkinci bir məsələ rəsmi Moskvanın Qərbi Üçüncü Dünya müharibəsi ilə təhdid etməsidir. Məlum olduğu kimi, Polşa NATO üzvü olduğu üçün ona qarşı müdaxilə hərbi alyansın 5-ci maddəsinin tətbiqinə yol aça bilər. Rusiyanın niyyəti Avropada müharibə qorxusu yaradaraq diqqəti Ukraynadan kənarlaşdırmaq ola bilər. Çünki son zamanlar Avropa həm Rusiyaya qarşı sanksiyaların tətbiqi, həm də Ukraynaya silah dəstəyinin gücləndirilməsi istiqamətində fəal addımlar atır. Moskva bunun qarşısını almaq üçün müəyyən təzyiq metodlarından istifadə edə bilər.

Kelloqun "Ukrayana müharibədə uduzmayacaq" fikri isə Rusiyaya mesajdır. Yəni Qərb heç bir təhdidə boyun əyməyəcək və müharibədə Ukraynanın məğlub olmasına imkan verməyəcək.